Një moment nga takimi mes presidentit Donald Trump dhe presidentit të FIFA-s, Gianni Infantino, në Shtëpinë e Bardhë është bërë viral në rrjetet sociale, pas një ndërhyrjeje humoristike të Trump gjatë fjalimit të kreut të FIFA-s.

Gjatë prezantimit të institucionit që drejton, Infantino tha se “FIFA është ofruesi zyrtar i lumturisë për njerëzimin prej 120 vitesh”, duke theksuar rolin e futbollit në sjelljen e gëzimit te tifozët.

Por Trump e ndërpreu me një batutë: “Deri sa skuadra e tij humbet, sigurisht!”, duke shkaktuar të qeshura në sallë.

Videoja u përhap me shpejtësi në platformat sociale, ku shumë përdorues e komentuan si një moment të papritur mes dy figurave të njohura të skenës ndërkombëtare.

Disa tifozë dhe komentues sportivë e lidhën ndërhyrjen e Trump me debatet e vazhdueshme rreth FIFA-s, kritikat për mënyrën e drejtimit të organizatës dhe pretendimet e tifozëve për favorizime ndaj disa skuadrave apo federatave.

Megjithatë, momenti u shoqërua kryesisht me të qeshura dhe nuk pati ndonjë reagim zyrtar negativ nga palët. Në qendër të skenës ishte trofeu i Kupës së Botës 2026, por vëmendjen e mori shkëmbimi i shkurtër verbal mes Trump dhe Infantinos.