Të paktën 50 persona kanë humbur jetën dhe rreth 500 të tjerë janë plagosur në sulmet e fundit amerikane ndaj Iranit, sipas Ministrisë iraniane të Shëndetësisë.

Sipas deklaratave të zëdhënësit të ministrisë, Hossein Kermanpour, të cituara nga CNN, 12 persona janë vrarë gjatë 24 orëve të fundit, duke e çuar bilancin total të viktimave që nga rikthimi i përshkallëzimit të konfliktit në 50.

Kermanpour tha se bombardimet kanë shkaktuar gjithashtu rreth 500 të plagosur që prej 27 qershorit, periudhë kur armëpushimi i brishtë në rajon filloi të dështojë dhe përplasjet u intensifikuan.

Mes viktimave të raportuara gjatë muajit të fundit, sipas autoriteteve iraniane, ndodhen edhe pesë gra dhe dy fëmijë.

Zhvillimi vjen në një kohë kur tensionet mes Shteteve të Bashkuara dhe Iranit vijojnë të rriten, me sulme dhe kundërsulme që kanë shtuar shqetësimet për një zgjerim të mëtejshëm të konfliktit në rajon.