Facebook është përballur me probleme teknike mëngjesin e së dielës, 19 korrik, duke shkaktuar vështirësi për mijëra përdorues në aksesimin e platformës.

Raportimet për ndërprerjet kanë nisur rreth orës 09:30, ku përdorues të shumtë kanë hasur probleme me hyrjen në llogaritë e tyre, hapjen e faqes kryesore dhe ngarkimin e përmbajtjeve.

Sipas të dhënave të publikuara nga Downdetector, platforma që monitoron ndërprerjet e shërbimeve online, numri i raportimeve për probleme me Facebook-un është rritur ndjeshëm gjatë orëve të mëngjesit.

Deri tani nuk ka një njoftim zyrtar nga kompania Meta mbi shkakun e ndërprerjes apo kohën e rikthimit të plotë të shërbimit.

Problemet duket se kanë prekur kryesisht aksesin në platformë dhe shfaqjen e përmbajtjeve për një pjesë të përdoruesve.

Facebook mbetet një nga rrjetet sociale më të përdorura në botë dhe ndërprerjet teknike në këtë platformë zakonisht prekin miliona përdorues në një periudhë të shkurtër.