INDI – Një ngjarje tronditëse është zbuluar në shtetin indian të Uttar Pradesh, ku autoritetet dyshojnë se një grua organizoi vrasjen e bashkëshortit të saj me ndihmën e të dashurit, duke përdorur një gjarpër helmues për ta bërë krimin të dukej si një aksident.

Policia ka arrestuar katër persona në lidhje me vdekjen e Atul Kumar Panwar, 32 vjeç, pronar i një qendre private për kujdesin e fëmijëve në distriktin Meerut. Viktima u gjet pa shenja jete në banesën ku jetonte me bashkëshorten dhe djalin e tyre gjashtëvjeçar.

Sipas hetimeve paraprake, bashkëshortja e tij, Damini, dyshohet se bashkëpunoi me shoferin e autobusit të shkollës, Tushar, me të cilin autoritetet pretendojnë se kishte një lidhje jashtëmartesore.

Hetuesit besojnë se fillimisht 32-vjeçarit iu dha qumësht i përzier me ilaçe gjumi. Pasi ai humbi ndjenjat, autorët e dyshuar përdorën një gjarpër krait, një nga speciet më helmues në Azi, për ta kafshuar ndërsa flinte. Qëllimi, sipas policisë, ishte që vdekja të paraqitej si pasojë e një pickimi aksidental.

Të nesërmen në mëngjes, gruaja njoftoi fqinjët se bashkëshorti kishte ndërruar jetë nga kafshimi i një gjarpri. Zvarraniku u gjet në shtrat pranë trupit të viktimës dhe u vra nga banorët e zonës. Shenjat e kafshimit në dorë dhe këmbë bënë që fillimisht autoritetet ta konsideronin rastin një aksident.

Hetimi mori një drejtim tjetër pasi babai i viktimës denoncoi pranë policisë se nusja e tij mund të ishte e përfshirë në vrasje. Gjatë verifikimeve, autoritetet zbuluan se shoferi i autobusit kishte nisur punë vetëm tre muaj më parë dhe dyshohej për një marrëdhënie intime me bashkëshorten e viktimës.

Si rezultat i hetimeve, policia arrestoi katër persona: gruan e viktimës, të dashurin e saj të dyshuar dhe dy persona që merren me kapjen dhe trajtimin e gjarpërinjve, të cilët akuzohen se siguruan dhe përdorën zvarranikun helmues për realizimin e planit kriminal.

Atul dhe Damini ishin martuar në vitin 2019 dhe prej katër muajsh jetonin në banesën ku ndodhi ngjarja së bashku me djalin e tyre. Vetëm tre muaj para vdekjes së 32-vjeçarit, çifti kishte hapur qendrën Krishna Kids, ku punonte edhe shoferi i arrestuar.

Sipas shefit të policisë së distriktit, provat e mbledhura deri tani tregojnë se vdekja e Atul Kumar Panwar nuk ishte aksidentale, por një vrasje e paramenduar, e organizuar për t’u dukur si një pickim fatal nga gjarpri.

Wife among four people arrested after a 32-year-old school operator in Uttar Pradesh’s Meerut was found dead at his rented home in J-Block Colony in Hastinapur on Friday morning, police said.

According to police officers, Atul Kumar Panwar was allegedly murdered by his wife,… pic.twitter.com/P6Tv9J5dVB

— Hate Detector 🔍 (@HateDetectors) July 18, 2026