VLORË – Qyteti i Vlorës i jep sot lamtumirën e fundit gazetarit Enrik Mehmeti, i cili humbi jetën tragjikisht në moshën 40-vjeçare si pasojë e një aksidenti.

Ceremonia e homazheve do të zhvillohet nga ora 12:00 deri në 14:00 në ambientet e Teatrit “Petro Marko”, ku familjarë, miq, kolegë dhe qytetarë do të kenë mundësinë të nderojnë figurën e gazetarit.

Pas përfundimit të homazheve, në orën 14:00, Enrik Mehmeti do të përcillet për në banesën e fundit.

Gazetari humbi jetën mbrëmjen e së premtes në zonën e Dajlanit, pranë Porto Novës në Vlorë. Sipas të dhënave paraprake të Policisë, ai dyshohet se humbi kontrollin e motomjetit me katër rrota që drejtonte, i cili u përmbys në një zonë bregdetare jashtë aksit rrugor.

Si pasojë e aksidentit, Mehmeti pësoi dëmtime të rënda. Ai u transportua me urgjencë në Spitalin Rajonal të Vlorës, por nuk arriti t’u mbijetonte plagëve.

Grupi hetimor vijon punën për zbardhjen e plotë të rrethanave të aksidentit.