Teheran – Irani ka njoftuar pezullimin e të gjitha angazhimeve të tij në kuadër të Memorandumit të Mirëkuptimit me Shtetet e Bashkuara, duke argumentuar se pala amerikane ka shkelur më parë detyrimet e parashikuara në marrëveshje.

Lajmi u bë i ditur nga zëvendësministri i Jashtëm iranian, Kazem Garibabadi, i cili deklaroi se vendimi është marrë pas veprimeve që, sipas Teheranit, përbëjnë shkelje të angazhimeve nga ana e Uashingtonit.

“Ne ishim në negociata, por vetë amerikanët ndërmorën veprime agresive, duke shkelur angazhimet e tyre. Prioriteti ynë tani është mbrojtja e vendit”, deklaroi Garibabadi.

Sipas raportimeve të mediave ndërkombëtare, Irani ka ndërmarrë sulme me raketa dhe dronë ndaj objektivave në Kuvajt, Bahrein dhe Jordani, duke synuar instalime të lidhura me praninë ushtarake amerikane në rajon.

Ndërkohë, shtetet e Gjirit Persik kanë dënuar sulmet ndaj infrastrukturës civile, duke i cilësuar ato si shkelje të së drejtës ndërkombëtare dhe të Kartës së Kombeve të Bashkuara.

Autoritetet iraniane kanë bërë të ditur gjithashtu se, për momentin, nuk planifikojnë rikthimin në bisedime me Shtetet e Bashkuara, duke theksuar se fokusi i tyre mbetet mbrojtja e vendit dhe reagimi ndaj sulmeve amerikane.

Zhvillimet e fundit sinjalizojnë një përshkallëzim të mëtejshëm të tensioneve në Lindjen e Mesme, ndërsa komuniteti ndërkombëtar vijon të bëjë thirrje për përmbajtje dhe rikthim në dialog.