Britani e Madhe – Një shtetas shqiptar me të kaluar kriminale ka fituar betejën ligjore kundër dëbimit nga Britania e Madhe, pasi një gjykatë emigracioni vendosi se largimi i tij do të sillte pasoja të rënda për bashkëshorten dhe familjen e tij.

Dardan Hoxhaj, i cili ishte dënuar në vitin 2018 për përfshirje në një rrjet të trafikimit të drogës me vlerë rreth 750 mijë paund, u lejua të qëndrojë në Britani pas pranimit të apelit të tij mbi bazën e të drejtave të njeriut.

Sipas dokumenteve të gjykatës së emigracionit, Hoxhaj kishte mbërritur në Britani në vitin 2017 dhe më pas ishte shpallur fajtor për disa vepra penale që lidhen me furnizimin me drogë dhe përdorimin e një dokumenti identiteti të falsifikuar. Ai u dënua me tre vite burg dhe u dëbua drejt Shqipërisë në shtator të vitit 2018, por u kthye në Britani vetëm një muaj më vonë.

Autoritetet britanike nuk arritën ta identifikonin për disa vite, deri kur ai aplikoi për qëndrim përmes Skemës së Zgjidhjes së BE-së, si partner i një shtetaseje të Zonës Ekonomike Evropiane.

Pas refuzimit të kërkesës së tij nga Ministria e Brendshme britanike në vitin 2025, Hoxhaj iu drejtua gjykatës dhe në maj të këtij viti apeli i tij u pranua.

Avokati i tij argumentoi se dëbimi do të ishte “tepër i rëndë dhe i padrejtë” për bashkëshorten e Hoxhajt, e cila sipas mbrojtjes ka probleme të shëndetit mendor si pasojë e përvojave traumatike të së kaluarës.

Gjykata mori në konsideratë argumentin se bashkëshortja e tij do të kishte vështirësi të mëdha nëse do të detyrohej të largohej ose nëse do të humbiste mbështetjen e tij në kujdesin ndaj familjes, përfshirë edhe kujdesin ndaj fëmijës së tyre.

Gjyqtarja Fiona Lindsley vlerësoi se argumentet e paraqitura nga mbrojtja ishin të mjaftueshme nga pikëpamja ligjore dhe kritikoi qëndrimin e Ministrisë së Brendshme, duke thënë se nuk ishte trajtuar në mënyrë të plotë ndikimi që do të kishte largimi i tij te familja.

Sipas vendimit, Hoxhaj luan një rol të rëndësishëm në përditshmërinë e familjes, duke ofruar mbështetje në kujdesin ndaj bashkëshortes dhe fëmijës së tij.

Vendimi nuk e fshin të kaluarën kriminale të Hoxhajt, por gjykata vlerësoi se rrethanat familjare dhe pasojat e mundshme të dëbimit përbënin arsye të mjaftueshme për t’i lejuar qëndrimin në Britani.