Tokio – Parlamenti japonez ka përfunduar debatin mbi të ardhmen e Fronit të Krizantemës, duke vendosur të ruajë rregullin tradicional të trashëgimisë perandorake vetëm për pasardhësit meshkuj të linjës atërore.

Vendimi vjen pas një diskutimi të gjatë rreth krizës së trashëgimisë në familjen perandorake, ndërsa pavarësisht mbështetjes së gjerë në opinionin publik për mundësinë që një grua të mund të bëhet perandoreshë, reforma e miratuar nuk sjell ndryshimin e këtij rregulli.

Ndryshimet e reja synojnë të zgjidhin problemin e mungesës së trashëgimtarëve meshkuj, duke parashikuar që të afërm të tjerë meshkuj mbi moshën 15 vjeç, të cilët nuk janë të martuar, të mund të rikthehen në familjen perandorake përmes birësimit.

Po ashtu, ligji i ri u lejon princeshave japoneze të ruajnë statusin mbretëror edhe pas martesës me persona jashtë familjes perandorake. Megjithatë, bashkëshortët dhe fëmijët e tyre nuk do të konsiderohen pjesë e familjes perandorake.

Kriza e trashëgimisë lidhet me numrin e kufizuar të anëtarëve meshkuj të familjes perandorake. Nga 16 anëtarë të rritur të familjes, vetëm pesë janë burra, ndërsa mungojnë breza të rinj meshkuj që të garantojnë vazhdimësinë e linjës tradicionale.

Trashëgimtari kryesor aktual është princi 19-vjeçar Hisahito, nipi i perandorit dhe djali i parë mashkull i lindur në familjen perandorake japoneze pas rreth katër dekadash. Nëse ai nuk do të ketë një djalë, sistemi aktual i trashëgimisë mund të përballet me një krizë të re.

Vendimi ka nxitur reagime të ndryshme në Japoni. Mbështetësit e linjës mashkullore argumentojnë se ajo është pjesë e traditës dhe identitetit të monarkisë japoneze, ndërsa kritikët thonë se reforma nuk përputhet me qëndrimin e shumicës së qytetarëve që mbështesin një ndryshim të rregullave të trashëgimisë.