Qafë Thanë – Kalimi në pikën kufitare të Qafë Thanës është kthyer në një sfidë për udhëtarët që udhëtojnë drejt Maqedonisë së Veriut. Fluksi i lartë i automjeteve ka sjellë pritje të gjata, me qytetarët që raportojnë vonesa deri në tre orë për të kaluar kufirin.

Pavarësisht njoftimeve të mëparshme nga ministritë e Brendshme të Shqipërisë dhe Maqedonisë së Veriut për një marrëveshje të re që do të lehtësonte procedurat dhe do të shkurtonte kohën e pritjes, zbatimi i sistemit të ri ende nuk ka nisur.

Si pasojë, udhëtarët vijojnë të përballen me radhë të gjata, duke qëndruar për orë të tëra në temperatura të larta. Situata është veçanërisht e vështirë gjatë sezonit turistik, kur numri i lëvizjeve në këtë pikë kufitare rritet ndjeshëm.

Qytetarët kërkojnë masa konkrete për përshpejtimin e procedurave dhe një menaxhim më efikas të fluksit, në mënyrë që pritjet e gjata në kufi të shmangen.