ANGLI- Një 30-vjeçar shqiptar, Denis Hani, është dënuar me 14 muaj burg nga Gjykata e Kurorës në Liverpool, pasi u shpall fajtor për përdorimin e dokumenteve të falsifikuara me qëllim qëndrimin e paligjshëm në Mbretërinë e Bashkuar.

Sipas prokurorisë, në maj të vitit 2022, Hani aplikoi për leje qëndrimi duke paraqitur një certifikatë martese të rreme, e cila pretendonte se ishte martuar me një shtetase rumune në Qipro në vitin 2019. Mashtrimi doli në dritë pas verifikimeve me autoritetet qipriote, të cilat konfirmuan se numri i certifikatës nuk përputhej me asnjë regjistrim zyrtar.

Mediat e huaja raportojnë se, i riu shqiptar u arrestua në shtëpinë e tij në Liverpool qershorin e kaluar. Gjatë marrjes në pyetje, ai pranoi se nuk e njihte kurrë gruan që figuronte në dokument, duke deklaruar se e kishte blerë certifikatën për të realizuar qëllimin e tij për të qëndruar në Britani.

Mbrojtja dhe vendimi i gjykatës Avokati mbrojtës, Eiran Reilly, argumentoi se Hani kishte qenë thjesht një klient dhe jo organizator i skemës, duke shtuar se i riu kishte punuar rregullisht, paguar taksa dhe tani dëshironte të kthehej në Shqipëri sa më parë. Hani kishte arritur të siguronte punë në sektorin e dekorimit dhe menaxhimit të pasurive, duke fituar mbi 24,000 paund në vitin e fundit tatimor.

"Ju ishit blerësi i një certifikate martese të rreme. Ky ishte një planifikim i rëndësishëm nga ana juaj për të marrë leje të përhershme qëndrimi," u shpreh gjykatësi. Përveç dënimit me 14 muaj burg, gjykata ka vendosur që pas përfundimit të vuajtjes së dënimit, 30-vjeçari të deportohet drejt Shqipërisë beje lajm cfare pret