Tiranë – Dëftesat për vitin shkollor 2025-2026 janë gjeneruar dhe mund të shkarkohen tashmë nga prindërit dhe nxënësit përmes portalit qeveritar e-Albania.

Lajmi është bërë i ditur nga ministrja e Arsimit, Mirela Kumbaro, e cila ka publikuar edhe udhëzimet për procedurën që duhet të ndiqet për marrjen e dokumentit elektronik.

Sipas saj, përdoruesit duhet të hyjnë në llogarinë e tyre në e-Albania, të zgjedhin seksionin “Dokumentet e mia”, të kërkojnë dokumentin me emrin “Dëftesë” dhe më pas të klikojnë opsionin “Shkarko” për ta ruajtur atë në formatin PDF.

“Dëftesat për vitin shkollor 2025-2026 janë gjeneruar dhe janë të disponueshme në portalin e-Albania”, deklaroi Kumbaro.

Ndërkohë, në portal vijon edhe procesi i regjistrimeve online për nxënësit që do të nisin klasën e parë dhe klasën e dhjetë. Afati për aplikimet është deri më 31 korrik.

Sipas urdhrit të Ministrisë së Arsimit, viti i ri shkollor për arsimin bazë dhe arsimin e mesëm të lartë do të nisë më 14 shtator 2026 dhe do të përfundojë më 18 qershor 2027.