Rajoni i Gjirit – Përplasjet ushtarake mes Shteteve të Bashkuara dhe Iranit kanë vijuar gjatë natës së shtatë të sulmeve të ndërsjella, me përdorim të raketave, dronëve dhe operacioneve ajrore.

Ushtria iraniane deklaroi se ka kryer një sulm raketor ndaj bazës amerikane Sheikh Isa në Bahrein, duke pretenduar se objektivat ishin një depo karburanti dhe infrastruktura e aviacionit amerikan.

Nga ana tjetër, Komanda Amerikane njoftoi se ka vijuar operacionet ushtarake kundër objektivave në Iran. Sipas deklaratës së publikuar në platformën X, forcat amerikane goditën "qendra mbikëqyrjeje, infrastrukturë logjistike ushtarake, depo nëntokësore armësh dhe kapacitete detare".

Sipas Komandës Amerikane, në operacione janë përdorur avionë luftarakë, dronë dhe anije luftarake.

Ndërkohë, Garda Revolucionare Islamike e Iranit (IRGC) bëri të ditur se ka ndaluar katër anije në Ngushticën e Hormuzit, të cilat sipas saj po përpiqeshin të kalonin zonën në kundërshtim me rregulloret e vendosura nga autoritetet iraniane.

"Në orët e fundit, katër anije, të mbështetura nga ushtria amerikane, u përpoqën të kalonin Ngushticën e Hormuzit dhe u ndaluan në një operacion të kombinuar me raketa dhe dronë", deklaroi Garda Revolucionare.

Zhvillimet e fundit rrisin më tej tensionet në një nga zonat më strategjike të botës, ku Ngushtica e Hormuzit konsiderohet një pikë kyçe për transportin global të energjisë.