Izrael – Autoritetet izraelite kanë ndërmarrë një ndryshim në klasifikimin ligjor të krokodilëve të Nilit, një vendim që sipas mediave vendase mund të hapë rrugën për përdorimin e tyre si pjesë e masave të sigurisë në burgje.

Sipas raportimeve, ideja u propozua në fund të vitit të kaluar nga ministri i Sigurisë Kombëtare, Itamar Ben-Gvir, i cili sugjeroi rrethimin e burgjeve me hendeqe të mbushura me krokodilë për të parandaluar arratisjet dhe për të forcuar sigurinë.

Fillimisht, plani u konsiderua i pazbatueshëm nga Autoriteti i Natyrës dhe Parqeve të Izraelit, pasi krokodilët e Nilit klasifikoheshin si kafshë të egra që mund të mbaheshin vetëm në kopshte zoologjike ose rezervate natyrore.

Megjithatë, mediat izraelite raportojnë se Ministrja e Mbrojtjes së Mjedisit, Idit Silman, ka riklasifikuar krokodilin e Nilit si një "kafshë të egër të kujdesur", duke lejuar mbajtjen e tyre edhe në ambiente të tjera, përfshirë potencialisht institucionet penitenciare.

Vendimi ka ngjallur debat, pasi këshilltarja ligjore e ministrisë thuhet se ka argumentuar se ministrja nuk kishte kompetencë për të ndryshuar në mënyrë të njëanshme statusin e kësaj specieje. Sipas raportimeve, Ben-Gvir dhe Silman zhvilluan gjithashtu një takim me përfaqësues të Autoritetit të Natyrës dhe Parqeve për të diskutuar zbatimin e planit.

Mediat izraelite bëjnë të ditur se Ben-Gvir synon që projekti të zbatohet fillimisht në burgun Ketziot, në jug të Izraelit, ku mbahen kryesisht të burgosur palestinezë. Pas paraqitjes së idesë, Shërbimi i Burgjeve të Izraelit (IPS) raportohet se e shqyrtoi propozimin dhe dërgoi oficerë në fermën e krokodilëve Hamat Gader për t’u njohur me mënyrën e mbajtjes dhe menaxhimit të zvarranikëve.

Sipas gazetës Maariv, IPS e ka vlerësuar pozitivisht propozimin, duke shqyrtuar mundësinë e përdorimit të krokodilëve më të vegjël, të cilët kushtojnë rreth 8 mijë dollarë secili, në vend të ekzemplarëve më të mëdhenj me një kosto prej rreth 20 mijë dollarësh. Një burim i cituar nga media izraelite është shprehur se investimi konsiderohet i arsyeshëm në raport me përfitimet e mundshme për sigurinë e burgjeve.

Plani mbetet në fazë diskutimi dhe deri më tani nuk është bërë e ditur nëse do të marrë miratimin përfundimtar për zbatim.