Andy Burnham pritet të marrë zyrtarisht detyrën si kryeministër i Britanisë së Madhe, ndërsa ka njoftuar se përbërja e kabinetit të ri qeveritar do të bëhet publike të hënën, pas takimit me Mbretin Charles III.

Burnham tha se nuk do të publikojë emrat e ministrave përpara marrjes së mandatit, për të shmangur paqartësitë gjatë procesit të formimit të qeverisë.

Një nga postet më të rëndësishme mbetet ai i ministrit të Financave. Sipas mediave britanike, Ed Miliband dhe Shabana Mahmood janë kandidatët kryesorë për të drejtuar Thesarin, pas largimit të Rachel Reeves.

Lideri i ri i Laburistëve mori drejtimin e partisë pasi siguroi mbështetjen e 379 deputetëve dhe organizatave të lidhura me të, duke pasuar Keir Starmer. Në fjalimin e tij të parë, ai premtoi një kabinet gjithëpërfshirës që do të përfaqësojë të gjitha rrymat brenda Partisë Laburiste dhe bëri thirrje për unitet përballë rritjes së ndikimit të Reform UK.

Në qendër të programit të qeverisë së re do të jetë reforma e sistemit të kujdesit social, të cilin Burnham e cilësoi të dështuar, duke premtuar financim më të qëndrueshëm dhe shërbime më cilësore për qytetarët.

Prioritete të tjera përfshijnë:

decentralizimin e pushtetit dhe transferimin e më shumë kompetencave te rajonet; riindustrializimin e vendit; mbështetjen për komunitetet punëtore.

Nga ana tjetër, lideri i Reform UK, Nigel Farage, ka kërkuar zgjedhje të përgjithshme, duke argumentuar se Burnham nuk ka marrë një mandat të drejtpërdrejtë nga qytetarët. Ndërsa kreu i Liberal Demokratëve, Ed Davey, është shprehur i gatshëm të bashkëpunojë me qeverinë e re për reformat në shëndetësi, kujdesin social dhe sektorin e ujit.