Kryetari i Partisë Demokratike, Sali Berisha, ka reaguar sërish ndaj deklaratave të ministres serbe Snezana Paunoviç për ngjarjet në Kosovë.

Në një postim në rrjetet sociale, Berisha e ka cilësuar tërheqjen e pjesshme të deklaratës nga ministrja serbe si “ndjesë të një monstre”, duke pretenduar se korrigjimi i bërë prej saj nuk ndryshon thelbin e qëndrimit.

Sipas Berishës, zëvendësimi i termit “spastrim etnik” me “deportim” tregon, sipas tij, një vijimësi të një mentaliteti që ai e cilëson racist.

“Ndjesa e një monstre! Deklarata e Snezana Paunoviçit, ministre në qeverinë e Aleksandar Vuçiçit, shkaktoi reagime të shumta”, shkroi Berisha, duke përmendur reagime nga institucione dhe figura politike ndërkombëtare.

Ai përsëriti kërkesën që ministrja serbe të shpallet “non grata”, duke e akuzuar për qëndrime të papranueshme ndaj Kosovës dhe shqiptarëve.

Deklaratat e Paunoviçit kanë shkaktuar reagime në Kosovë dhe rajon, ndërsa ajo më pas ka sqaruar qëndrimin e saj duke ndryshuar terminologjinë e përdorur në deklaratën fillestare.