Presidenti amerikan Donald Trump ka hapur një tjetër debat me Kanadanë, këtë herë lidhur me tymin e zjarreve pyjore që kalon kufirin dhe ndikon në cilësinë e ajrit në disa zona të Shteteve të Bashkuara.

Trump ka deklaruar se dëmi ekonomik i shkaktuar nga ndotja duhet të përfshihet në tarifat doganore ndaj mallrave kanadeze, duke e bërë këtë çështje pjesë të përplasjeve tregtare mes dy vendeve.

Në një reagim të publikuar në platformën e tij Truth Social, presidenti amerikan akuzoi autoritetet kanadeze se nuk po menaxhojnë siç duhet pyjet dhe zonat me bimësi, duke lejuar përhapjen e zjarreve që, sipas tij, po ndikojnë negativisht në ajrin e SHBA-së.

“Po e mbajmë Kanadanë përgjegjëse për faktin se nuk po mirëmban siç duhet pyjet dhe shkurret e saj. Shtetet e Bashkuara po përballen në mënyrë të panevojshme me ajër të ndotur, të dëmshëm dhe të pashëndetshëm”, shkroi Trump.

Ai e cilësoi situatën si një formë “neglizhence të qëllimshme”, duke pretenduar se zjarret dhe pasojat e tyre janë kthyer në një problem të përsëritur që i kushton SHBA-së miliarda dollarë.

Sipas presidentit amerikan, kostot e shkaktuara nga ndotja e ajrit duhet të llogariten në tarifat që Kanadaja paguan për eksportet drejt tregut amerikan.

Deklaratat e Trump vijnë në një kohë kur marrëdhëniet mes Uashingtonit dhe Otavës janë përballur me tensione të reja mbi çështjet tregtare dhe politikat ekonomike.