Maqedonia e Veriut po përballet me një krizë të thellë demografike, e ndikuar nga rënia e lindshmërisë dhe emigrimi i vazhdueshëm i të rinjve.

Sipas Raportit Botëror të Migracionit 2026 të Organizatës Ndërkombëtare për Migracionin (IOM), vendi renditet ndër shtetet më të prekura në Evropë për shkak të nivelit të ulët të lindjeve, i cili është nën normën e nevojshme për zëvendësimin e brezave.

Raporti thekson se largimi i popullsisë në moshë riprodhuese po e përkeqëson më tej situatën, duke reduktuar potencialin demografik të vendit për dekadat e ardhshme.

Analiza e zhvillimeve demografike gjatë periudhës 2005-2024 tregon se një pjesë e madhe e vendeve të Evropës Lindore dhe Ballkanit kanë regjistruar rënie të ndjeshme të numrit të banorëve, ndërsa disa shtete të tjera evropiane kanë arritur të ruajnë ose rrisin popullsinë.

Ekspertët paralajmërojnë se pa politika të qarta për mbështetjen e familjeve, rritjen e lindshmërisë dhe frenimin e emigrimit të fuqisë së re punëtore, tendenca e rënies demografike mund të vijojë edhe në vitet e ardhshme.

Sipas vlerësimeve, sfida demografike mbetet një nga problemet më të mëdha sociale dhe ekonomike për vendet e Ballkanit, duke ndikuar në tregun e punës, sistemin e pensioneve dhe zhvillimin afatgjatë të shoqërisë.