Një 37-vjeçar është arrestuar nga Policia e Durrësit, pasi dyshohet se grabiti me forcë xhiron ditore të një dyqani të një kompanie celulare.

Sipas policisë, ngjarja ka ndodhur rreth orës 15:15 në lagjen nr. 16 të Durrësit, ku Gerald Ramaj dyshohet se ka hyrë në ambientet e biznesit dhe ka marrë me forcë shumën prej rreth 100 mijë lekësh, që përbënte xhiron ditore të dyqanit.

Menjëherë pas marrjes së njoftimit, shërbimet e Forcës së Posaçme Operacionale "Shqiponja", në bashkëpunim me strukturat e Komisariatit të Policisë Durrës, organizuan veprimet për identifikimin dhe kapjen e autorit të dyshuar.

Falë veprimeve të shpejta operacionale, 37-vjeçari u lokalizua dhe u arrestua në lagjen nr. 6 të qytetit.

Nën drejtimin e Prokurorisë, grupi hetimor po vijon veprimet për dokumentimin e plotë ligjor të ngjarjes dhe sqarimin e të gjitha rrethanave të saj.

Materialet procedurale i janë referuar Prokurorisë për veprime të mëtejshme.