Kupa e Botës 2026 po vendos standarde të reja jo vetëm në aspektin sportiv, por edhe në atë ekonomik. Sipas parashikimeve të FIFA-s, turneu pritet të gjenerojë mbi 10 miliardë dollarë të ardhura, duke u bërë eventi sportiv më fitimprurës i zhvilluar ndonjëherë.

Presidenti i FIFA-s, Gianni Infantino, kishte paralajmëruar se Botërori 2026 do të sillte pothuajse dyfishin e të ardhurave të edicionit të Katarit 2022. Me turneun drejt fazës finale, objektivi duket se është pranë realizimit.

Të ardhurat pothuajse dyfishohen

Botërori i Katarit në vitin 2022 gjeneroi rreth 5.8 miliardë dollarë të ardhura, një rekord për FIFA-n në atë kohë.

Edicioni i vitit 2026, i organizuar nga Shtetet e Bashkuara, Kanadaja dhe Meksika, pritet ta çojë këtë shifër në mbi 10 miliardë dollarë, duke lënë pas edhe evente të tjera madhore sportive.

Për krahasim, Lojërat Olimpike Paris 2024 gjeneruan pak më shumë se 5 miliardë dollarë, ndërsa Euro 2024 në Gjermani rreth 2.9 miliardë dollarë.

SHBA, motori ekonomik i turneut

Një nga faktorët kryesorë të suksesit financiar është organizimi i pjesës më të madhe të ndeshjeve në Shtetet e Bashkuara, ku u zhvilluan 78 nga 104 takimet e turneut.

Tregu amerikan ka sjellë përfitime të konsiderueshme për FIFA-n përmes:

çmimeve rekord të biletave; kontratave televizive me vlerë të lartë; sponsorizimeve të mëdha; paketave VIP dhe mikpritjes.

Mbi 6 milionë tifozë kanë ndjekur ndeshjet nga stadiumet, ndërsa vetëm nga biletat dhe paketat e mikpritjes FIFA parashikon të arkëtojë rreth 3.5 miliardë dollarë.

Sponsorët dhe televizionet, burimi kryesor i fitimeve

Përveç partnerëve tradicionalë si Adidas, Coca-Cola, Visa, Hyundai dhe Aramco, FIFA ka tërhequr edhe kompani të mëdha amerikane si Bank of America dhe McDonald’s, me kontrata sponsorizimi që arrijnë deri në 100 milionë dollarë secila.

Megjithatë, burimi më i madh i të ardhurave mbeten të drejtat televizive. Për ciklin 2023-2026, FIFA pret të arkëtojë rreth 5.2 miliardë dollarë nga transmetimet, ndërsa për periudhën 2027-2030 synon të kalojë shifrën e 6 miliardë dollarëve.

Interesi në tregun amerikan ka qenë rekord, me disa ndeshje që kanë tërhequr dhjetëra miliona shikues.

Formati i ri rrit potencialin ekonomik

Zgjerimi i Kupës së Botës nga 32 në 48 kombëtare dhe rritja e numrit të ndeshjeve nga 64 në 104 ka krijuar më shumë hapësira për sponsorizime, transmetime televizive dhe shitje biletash.

Presidenti i FIFA-s ka lënë të hapur edhe mundësinë që Botërori 2030 të zgjerohet në 64 skuadra, megjithëse ekspertët paralajmërojnë se një format edhe më i madh mund të ndikojë në cilësinë sportive të turneut.

Sfida për Botërorin 2030

Edhe pse Botërori 2026 pritet të vendosë rekorde financiare, FIFA pranon se do të jetë e vështirë të përsërisë të njëjtin sukses në edicionin e vitit 2030, i cili do të organizohet kryesisht nga Maroku, Portugalia dhe Spanja.

Megjithatë, organizata beson se rritja e vazhdueshme e interesit global për futbollin do të vazhdojë të gjenerojë të ardhura rekord, duke e konsoliduar Kupën e Botës si produktin sportiv më të vlefshëm dhe më fitimprurës në botë.