Kryeministri Edi Rama ka reaguar pas debatit publik mes analistit Lutfi Dervishi dhe deputetes së Partisë Socialiste, Briseida Çakërri, lidhur me kursin e këmbimit të euros dhe forcimin e lekut.

Gjatë një takimi me sipërmarrësit, Rama kritikoi analistin pa i përmendur emrin, por duke iu referuar debatit të bërë viral në rrjetet sociale pas një interviste ku Dervishi e pyeti deputeten se si e shpjegonte “shpartallimin e euros”.

Në përgjigjen e saj, Çakërri deklaroi se “është forcuar leku”, duke u bërë objekt diskutimi dhe reagimesh të shumta online.

Rama tha se deklarata e deputetes ishte e saktë dhe kritikoi qëndrimin e analistit, duke pretenduar se ai nuk kishte formimin apo përvojën profesionale për të komentuar mbi çështjet ekonomike.

“Një personazh që nuk ka asnjë atribut që të mbështesë kompetencën e vet, as shkollë për ekonomi e financë, as ndonjë trajnim për ekonomi e financë, asnjë ditë punë gjëkundi, përveçse në industrinë e llafeve dhe thashethemeve”, u shpreh Rama.

Kryeministri argumentoi se situata me euron nuk duhet interpretuar si një rënie e monedhës europiane, por si një forcim i monedhës kombëtare.

“S’ka rënë euro, por është rritur leku”, tha Rama, duke shtuar se forcimi i lekut është reflektim i ndryshimeve në ekonominë shqiptare gjatë viteve të fundit.

Debati mes Dervishit dhe Çakërrit vijon të diskutohet publikisht, ndërsa kursi i këmbimit të euros dhe ndikimi i tij në ekonomi mbetet një nga temat më të komentuara.