Xi Jinping-u takohet me sekretarin e përgjithshëm të OKB-së Antonio Guterres

Presidenti kinez Xi Jinping u takua të premten pasdite në Shangai me sekretarin e përgjithshëm të OKB-së Antonio Guterres, që ndodhet në Kinë për të marrë pjesë në Konferencën Botërore të Inteligjencës Artificiale 2026 dhe Takimin e Nivelit të Lartë për Qeverisjen Globale të AI-së.

Gjatë takimit, Xi u shpreh se ky vit shënon 55-vjetorin e rikthimit të vendit të ligjshëm të Republikës Popullore të Kinës në OKB. Gjatë këtyre 55 vjetëve, Kina ka qenë gjithmonë ndërtuese e paqes botërore, kontribuese për zhvillimin global dhe mbrojtëse e rendit ndërkombëtar, duke mbështetur me vendosmëri OKB-në.

Xi Jinping theksoi më tej që, në situatën e tanishme ndërkombëtare në ndryshim dhe me trazira në rritje, duhet të zbatohet më tej mulilateralizmi i vërtetë dhe të ringjallen statusi e roli i OKB-së. Së pari, duhet t’i përmbahemi drejtësisë dhe sovraniteti, tërësia territoriale dhe të drejtat e interesat e ligjshme të çdo vendi duhet të respektohen. Së dyti, duhet të respektohet Karta e OKB-së dhe të mbrohen sistemi e rregullat ndërkombëtare të vendosura pas përfundimit të Luftës së Dytë Botërore. Së treti, mbi 190 vendet e botës duhet të bashkohen për të përballuar së bashku sfidat globale.

Vendet e mëdha duhet të mbajnë më shumë përgjegjësi, tha Xi, duke shtuar që Kina ndërmerr gjithmonë veprime konkrete për të nxitur aktivisht eksplorimin e mënyrës së duhur që vendet e ndryshme të bashkëjetojnë në epokën e re, duke i sjellë botës më shumë faktorë të qëndrueshëm e të sigurt.

Sekretari i përgjithshëm Antonio Guterres u shpreh nga ana e tij që Kina ka mbështetur gjithmonë me vendosmëri multilateralizmin e kauzën e OKB-së dhe ka nxitur bashkëpunimin ndërkombëtar, duke dhënë një shembull për botën.

OKB-ja do të vazhdojë të forcojë bashkëpunimin me Kinën, të kundërshtojë unilateralizmin, proteksionizmin e hegjemonizmin, të mbrojë Kartën e OKB-së dhe ligjin ndërkombëtar, të çojë përpara procesin e një bote shumëpolare dhe të mbrojë interesat e përbashkët të bashkësisë ndërkombëtare.