Një kapiten shqiptar i një trageti pasagjerësh është arrestuar në portin e Korfuzit, pasi autoritetet greke konstatuan se anija kishte në bord më shumë pasagjerë sesa lejonte certifikata e lundrimit.

Sipas informacioneve të bëra publike nga autoritetet portuale greke, kapiteni është një 45-vjeçar shqiptar, drejtues i një trageti me flamur të Saint Kitts and Nevis, i cili kishte mbërritur në Korfuz nga një port në Shqipëri.

Pas mbërritjes së mjetit lundrues në port, oficerët e Autoritetit Qendror Portual të Korfuzit kryen kontrollin dhe numërimin e pasagjerëve, duke konstatuar se numri i tyre tejkalonte kapacitetin maksimal të përcaktuar në dokumentacionin e anijes.

Kapiteni u arrestua për shkelje të dispozitave të Kodit të së Drejtës Publike Detare dhe të legjislacionit që rregullon transportin e pasagjerëve mbi kapacitetin e lejuar, si dhe procedurat e kontrollit dhe regjistrimit.

Autoritetet portuale kanë nisur hetimet paraprake për zbardhjen e plotë të ngjarjes, ndërsa ka filluar edhe procedura për vendosjen e masave administrative të parashikuara nga ligji.