Policia e Korçës ka arrestuar dy persona në kuadër të hetimeve për atentatin e dështuar ndaj Brian Syzos, të ndodhur më 30 qershor në Pogradec, ku 35-vjeçari mbeti i plagosur rëndë.

Në pranga ka rënë 22-vjeçari Edison Agolli, vëllai i autorit të dyshuar të atentatit, i cili ishte shpallur në kërkim që prej ditës së ngjarjes. Sipas hetimeve, ai dyshohet se ka bashkëpunuar me vëllain e tij dhe dy persona të tjerë në organizimin e sulmit ndaj Syzos.

Ndaj Agollit rëndon akuza për "vrasje me paramendim të mbetur në tentativë, e kryer për interes ose hakmarrje dhe në bashkëpunim".

Burime pranë grupit hetimor bëjnë me dije se gjatë hetimeve është zbuluar edhe një kamerë sigurie e vendosur pranë Institucionit të Ekzekutimit të Vendimeve Penale në Drenovë. Dyshohet se pajisja ishte instaluar nga Agolli për të monitoruar lëvizjet e Brian Syzos dhe për të mbledhur informacion mbi aktivitetin e tij.

Ndërkohë, në pranga është vënë edhe vetë Brian Syzo, por për një çështje të ndryshme. Arrestimi i tij është kryer në zbatim të vendimit të Gjykatës së Apelit, e cila ka lënë në fuqi dënimin e dhënë nga Gjykata e Pogradecit në vitin 2023.

Syzo është dënuar me 3 vite e 4 muaj burg për veprën penale "Prodhimi dhe shitja e lëndëve narkotike", dënim që do ta vuajë në një institucion të ekzekutimit të vendimeve penale.

Hetimet për atentatin ndaj 35-vjeçarit vijojnë, ndërsa autoritetet po punojnë për dokumentimin e plotë të ngjarjes dhe identifikimin e të gjithë personave të përfshirë.