Franca është përfshirë nga mot i keq dhe stuhi të forta vetëm pak ditë pas një vale të zgjatur të temperaturave të larta, duke shkaktuar viktima dhe dëme të konsiderueshme në disa zona të vendit.

Të paktën tre persona kanë humbur jetën si pasojë e ngjarjeve të lidhura me stuhitë, ndërsa rreth 53 mijë familje kanë mbetur pa energji elektrike, sipas mediave franceze dhe operatorit të rrjetit energjetik Enedis.

Në Saint-Victornienne, në departamentin Haute-Vienne, një grua humbi jetën pasi një pemë u rrëzua mbi të gjatë stuhisë. Ndërkohë, në Dolomieux, në lindje të Francës, një burrë u gjet i pajetë pasi një punishte u përfshi nga zjarri pas goditjes nga rrufeja.

Operatori Enedis njoftoi se ndërprerjet e energjisë prekën kryesisht rajonet Auvergne-Rhône-Alpes në juglindje dhe Nouvelle-Aquitaine në jugperëndim të vendit, ku ekipet e emergjencës vijuan punën për rikthimin e furnizimit.

Shërbimi meteorologjik francez Meteo-France kishte lëshuar më herët një alarm portokalli për stuhi në disa zona, duke paralajmëruar për erëra të forta dhe breshër nga Masivi Qendror deri në Alpe. Paralajmërimet u hoqën të premten, pasi situata atmosferike filloi të përmirësohej.

Stuhitë erdhën pas një periudhe me temperatura ekstreme që prekën Francën dhe disa vende të tjera europiane, duke rritur shqetësimet për ndikimet e ndryshimeve klimatike dhe fenomenet gjithnjë e më të shpeshta të motit ekstrem.