Kryeministri Edi Rama ka reaguar për përfshirjen e elementeve të muzikës tradicionale shqiptare në frymëzimin e kolonës zanore të filmit të shumëpritur “The Odyssey”, me regji të Christopher Nolan.

Përmes një postimi në rrjetet sociale, Rama deklaroi se kompozitori fitues i çmimit Oscar, Ludwig Göransson, është njohur me iso-polifoninë shqiptare gjatë një vizite në jug të vendit, si dhe me tingujt e fyellit dyjar.

Sipas kryeministrit, këto elemente të traditës muzikore shqiptare janë bërë burim frymëzimi për muzikën e filmit të ri hollivudian, i cili pritet të jetë një nga produksionet më të mëdha kinematografike të viteve të fundit.

“Shqipëria dhe vlerat e saj vazhdojnë të frymëzojnë deri në produksionet më të mëdha të Hollivudit”, u shpreh Rama, duke vlerësuar rolin e trashëgimisë kulturore shqiptare në skenën ndërkombëtare.

Iso-polifonia shqiptare është pjesë e Trashëgimisë Kulturore Jomateriale të UNESCO-s dhe konsiderohet një nga pasuritë më të rëndësishme të traditës muzikore të vendit.