Kursi i euros ndaj lekut ka shënuar një tjetër rënie rekord, duke zbritur në nivelin më të ulët historik të regjistruar ndonjëherë.

Sipas të dhënave të Bankës së Shqipërisë, euro u këmbye sot me 93.64 lekë, duke vijuar tendencën rënëse të muajve të fundit. Që nga fillimi i vitit, monedha europiane ka humbur rreth 3.2% të vlerës ndaj lekut, ndërsa në raport vjetor rënia ka arritur në 4.2%.

Agjentët e tregut valutor e lidhin këtë zhvillim kryesisht me faktorët sezonalë të verës, kur rritja e numrit të turistëve sjell më shumë hyrje valutore në vend dhe shton ofertën e euros në treg.

Përveç ndikimit sezonal, forcimi i lekut lidhet edhe me rritjen e flukseve valutore nga turizmi dhe investimet e huaja direkte, të cilat kanë përmirësuar bilancin e pagesave të vendit.

Një faktor tjetër që ka ndikuar në forcimin e monedhës vendase është politika fiskale, pasi suficitet buxhetore gjatë pjesës më të madhe të vitit kanë kufizuar sasinë e lekut në qarkullim.

Banka e Shqipërisë ka ndërhyrë në treg për të frenuar rënien e euros përmes blerjeve të valutës. Gjatë viteve 2024-2025, Banka Qendrore ka blerë mbi 2 miliardë euro, ndërsa këtë vit planifikon të rrisë më tej rezervat valutore përmes ankandeve me vlerë 330-450 milionë euro.

Megjithatë, forcimi i vazhdueshëm i lekut ka sjellë edhe pasoja për disa sektorë të ekonomisë. Eksportuesit, veçanërisht industria fason, kanë hasur vështirësi për shkak të uljes së konkurrueshmërisë në tregjet e huaja, ndërsa edhe sektori i turizmit përballet me ndikimin e një monedhe vendase më të fortë.

Nga ana tjetër, euro e dobët ka ndihmuar në uljen e kostove të importeve dhe në zbutjen e presioneve inflacioniste për konsumatorët shqiptarë.