Qeveria e re hungareze, e drejtuar nga kryeministri Peter Magyar, ka ndërmarrë një reformë të gjerë kushtetuese, duke shfrytëzuar shumicën prej dy të tretash në Parlament për të ndryshuar strukturat e ngritura gjatë 16 viteve të qeverisjes së Viktor Orbán.

Ndryshimet kushtetuese, të miratuara vetëm dy muaj pas ardhjes në pushtet të qeverisë së re, synojnë largimin e një sërë zyrtarëve të emëruar gjatë qeverisjes së Orbán, mes tyre presidenti Tamás Sulyok dhe disa gjyqtarë të Gjykatës Kushtetuese.

Sipas qeverisë së Peter Magyar, reforma synon rikthimin e pavarësisë së institucioneve, forcimin e shtetit të së drejtës dhe kufizimin e mekanizmave që, sipas saj, ishin përdorur për të konsoliduar pushtetin e qeverisë së mëparshme.

Ndryshimet parashikojnë rikthimin e kompetencave të plota të Gjykatës Kushtetuese, kufizimin e numrit të ligjeve që kërkojnë shumicë të cilësuar për t’u miratuar, krijimin e një agjencie për rikuperimin e pasurive të përfituara në mënyrë të paligjshme, si dhe vendosjen e një kufiri prej tre mandatesh për deputetët.

Kryeministri Peter Magyar e ka cilësuar reformën si pjesë të "Operacionit Purgator", duke argumentuar se Kushtetuta e ndryshuar gjatë qeverisjes së Orbán ishte shndërruar në një instrument për ruajtjen e kontrollit politik mbi institucionet.

Nga ana tjetër, partia Fidesz e Viktor Orbán dhe aleatët e saj bojkotuan seancën parlamentare ku u votuan ndryshimet, duke i cilësuar ato si një goditje ndaj demokracisë dhe shtetit të së drejtës.

Megjithatë, një pjesë e organizatave të shoqërisë civile dhe ekspertëve të së drejtës kanë shprehur rezerva për disa prej ndryshimeve, duke paralajmëruar se edhe procesi i reformimit duhet të respektojë standardet e shtetit ligjor.

Ndërkohë, qeveria hungareze ka bërë të ditur se ndryshimet e miratuara përbëjnë vetëm fazën e parë të reformës, ndërsa nga vjeshta pritet të nisë hartimi i një Kushtetute të re për Hungarinë.