Inteligjenca artificiale po zë një rol gjithnjë e më të rëndësishëm në sistemet shëndetësore europiane, duke u përdorur për diagnostikimin e sëmundjeve, menaxhimin e pacientëve dhe organizimin e shërbimeve. Megjithatë, Organizata Botërore e Shëndetësisë (OBSH) paralajmëron se mungesa e rregullave dhe mekanizmave të mbikëqyrjes mund të krijojë rreziqe serioze për pacientët.

Paralajmërimi është bërë nga drejtori rajonal i OBSH-së për Europën, Hans Kluge, i cili theksoi se hendeku mes përdorimit të inteligjencës artificiale dhe kontrollit të saj përbën sfidën kryesore për sistemet shëndetësore.

Sipas të dhënave të OBSH-së, dy të tretat e 53 vendeve të Rajonit Europian përdorin tashmë inteligjencën artificiale në proceset e diagnostikimit, ndërsa rreth gjysma kanë vënë në funksion chatbot-e me AI për komunikimin me pacientët.

Megjithatë, vetëm një në 12 vende ka një strategji për qeverisjen e kësaj teknologjie. Vetëm 8% e vendeve disponojnë një strategji të posaçme për inteligjencën artificiale në shëndetësi, ndërsa pothuajse 40% nuk kanë udhëzime etike për përdorimin e saj.

Hans Kluge paralajmëroi se algoritmet me gabime mund të çojnë në diagnoza të pasakta, duke rrezikuar drejtpërdrejt shëndetin e pacientëve.

OBSH evidenton gjithashtu mungesa në përgatitjen e profesionistëve të shëndetësisë për përdorimin e inteligjencës artificiale. Sipas organizatës, vetëm një në pesë vende përfshin këtë teknologji në programet universitare për studentët e mjekësisë, ndërsa vetëm një në katër ofron trajnime për personelin shëndetësor.

Për të adresuar këto sfida, OBSH pritet të prezantojë në vitin 2028 një udhërrëfyes për përdorimin e inteligjencës artificiale në shëndetësi, me synimin për të garantuar standarde më të larta sigurie dhe mbrojtjeje për pacientët.