Janë publikuar pamje të reja nga konflikti i ndodhur në ambientet e Poliklinikës në lagjen “Vasil Shanto” në Shkodër, ku mbeti i plagosur 32-vjeçari Vildan Kepëca.

Sipas pamjeve të nxjerra nga kamerat e sigurisë dhe hetimeve paraprake, konflikti nis kur Agron Mehmeti godet fillimisht me grushte 32-vjeçarin.

Më pas në përleshje përfshihet edhe djali i tij, 18-vjeçari Arvin Fregjaj, i cili dyshohet se nxjerr një thikë nga borseti dhe godet disa herë Vildan Kepëcën, duke e lënë të plagosur.

Pas ngjarjes, Policia ka arrestuar Agron Mehmetin dhe Arvin Fregjajn. Ata akuzohen për veprën penale “Vrasja me dashje”, e mbetur në tentativë, kryer në bashkëpunim, ndërsa hetimet vijojnë për zbardhjen e plotë të rrethanave dhe motiveve të konfliktit.

Në vijim të ngjarjes, uniformat blu kanë arrestuar edhe vëllanë e të plagosurit, pasi dyshohet se tentoi të hakmerrej me armë zjarri, konkretisht me një pistoletë, për plagosjen e vëllait të tij.

Policia vijon hetimet për dokumentimin e plotë të ngjarjes.