Elbasani i ka dhënë fund aventurës në Conference League, pasi u eliminua nga BATE Borisov në raundin e parë kualifikues vetëm pas goditjeve të penalltive.

Pas barazimit 1-1 në ndeshjen e parë të zhvilluar në Shqipëri, skuadra e drejtuar nga Ivan Gvozdenović udhëtoi drejt Azerbajxhanit, ku u luajt sfida e kthimit ndaj bjellorusëve, me synimin për të siguruar kualifikimin në raundin e dytë.

Megjithatë, në 120 minutat e lojës, Elbasani nuk arriti të krijonte raste të mjaftueshme për të vendosur ndeshjen, ndërsa portieri Aleksovski u bë protagonist me disa pritje vendimtare që mbajtën ekipin në garë. Koha e rregullt dhe ajo shtesë u mbyllën me rezultatin 0-0, duke bërë që gjithçka të vendosej nga pika e bardhë.

Seria e penalltive nisi mirë për skuadrën shqiptare, por gjithçka ndryshoi te gjuajtja e pestë, kur Karrica humbi mundësinë për t’i siguruar kualifikimin Elbasanit.

BATE Borisov përfitoi nga gabimi dhe mori epërsinë, ndërsa Epito goditi traversën, duke vulosur fitoren 5-4 të skuadrës bjelloruse në serinë e penalltive.

Në këtë mënyrë, Elbasani mbyll pjesëmarrjen e tij të parë në kompeticionet evropiane, ndërsa BATE Borisov siguron kualifikimin në raundin e dytë të Conference League.