Një 18-vjeçar në Britani është dënuar me tre vite burg pasi përplasi me automjet një këmbësor 84-vjeçar, e la të plagosur rëndë në rrugë dhe u largua nga vendi i aksidentit pa i dhënë ndihmë.

Sonny Horsfall u shpall fajtor nga Gjykata e Kurorës në Durham për shkaktim të lëndimeve të rënda përmes drejtimit të rrezikshëm të automjetit, drejtim pa leje, mungesë siguracioni dhe largim nga vendi i aksidentit. Gjykata i ka vendosur gjithashtu ndalimin e drejtimit të automjeteve për katër vite.

Ngjarja e rëndë ndodhi më 22 prill në Redcar, North Yorkshire. Sipas hetimeve, 18-vjeçari humbi kontrollin e një automjeti Audi A4, të cilin sapo e kishte blerë, doli në trotuar dhe përplasi 84-vjeçarin Eddie, i cili po kthehej në shtëpi.

Pamjet e kamerave të sigurisë treguan momentin kur makina doli nga rruga dhe goditi të moshuarin, ndërsa i riu u largua menjëherë nga vendi i ngjarjes.

Gjatë hetimeve, autoritetet zbuluan edhe materiale të regjistruara në telefonin e Horsfall, ku ai shfaqej duke drejtuar me shpejtësi të lartë, duke kryer manovra të rrezikshme dhe duke kaluar semaforë me dritë të kuqe.

Në një prej videove ai dëgjohej duke thënë: “Sapo e bleva këtë bishë”, ndërsa në një tjetër shprehej: “Në djall me dritën e kuqe”.

Pas aksidentit, 18-vjeçari u kthye në shtëpi, porositi pica dhe komunikoi me miqtë përmes Snapchat-it. Në një mesazh zanor ai tha: “Nuk e di çfarë godita… po ha pica”, ndërsa më pas pranoi se kishte menduar se mund të kishte plagosur rëndë ose vrarë dikë.

Prokuroria bëri të ditur se në momentin e aksidentit i riu nuk kishte patentë drejtimi, ishte i skualifikuar për të drejtuar automjete dhe makina nuk ishte e siguruar.

Si pasojë e përplasjes, 84-vjeçari pësoi fraktura të shumta në legen, shpinë dhe këmbën e djathtë. Ai qëndroi disa ditë në kujdes intensiv dhe, pavarësisht ndërhyrjes kirurgjikale, vijon të ketë vështirësi të mëdha në lëvizje dhe dhimbje të vazhdueshme.