Kryeministrja italiane Giorgia Meloni ka pësuar një tjetër goditje politike, pasi një amendament i rëndësishëm i propozuar nga partia e saj, Fratelli d’Italia, nuk arriti të miratohej në Dhomën e Deputetëve në Romë.

Në votimin e fshehtë, kundër propozimit votuan 188 deputetë, ndërsa 187 ishin pro, duke shkaktuar një humbje të ngushtë për shumicën qeverisëse. Amendamenti parashikonte rikthimin e votave preferenciale, duke u dhënë mundësi zgjedhësve të favorizonin kandidatë të veçantë brenda listave të partive.

Meloni prej kohësh kërkon një reformë të thellë të sistemit zgjedhor, përmes së cilës kryeministri do të zgjidhej drejtpërdrejt dhe partia fituese do të përfitonte një bonus mandatesh për të garantuar më shumë stabilitet politik.

Pavarësisht mbështetjes së deklaruar nga partnerët e koalicionit, Forza Italia dhe Lega, rezultati i votimit ka ngritur dyshime se disa deputetë të shumicës mund të kenë votuar kundër. Opozita ka kërkuar menjëherë dorëheqjen e kryeministres dhe zhvillimin e zgjedhjeve të reja.

“E provuam. Përsëri fitoi moçali”, u shpreh Meloni pas humbjes në parlament.

Megjithatë, partnerët e koalicionit kanë mohuar se kjo ngjarje mund të çojë në një krizë politike. Forza Italia ka deklaruar se reforma duhet të vijojë, duke e cilësuar atë të rëndësishme për garantimin e stabilitetit në vend.

Kjo është goditja e dytë politike për Melonin brenda pak muajsh. Më herët, në pranverë, ajo dështoi edhe me reformën e drejtësisë, pasi italianët e rrëzuan me shumicë të qartë në një referendum.

Meloni drejton Italinë që prej vjeshtës së vitit 2022 dhe, nëse qeveria e saj vijon mandatin deri pas verës, ajo pritet të bëhet kryeministrja me qëndrimin më të gjatë pa ndërprerje në historinë e vendit.