Një ngjarje e rëndë ka tronditur qytetin e Fierit, ku një 7-vjeçare, e cila mbeti e plagosur rëndë në një aksident rrugor pak ditë më parë, ka ndërruar jetë.

Sipas informacioneve paraprake, automjeti me të cilin udhëtonte e mitura humbi kontrollin gjatë lëvizjes në unazën e Fierit dhe më pas u përplas me murin e një banese.

Si pasojë e përplasjes, 7-vjeçarja pësoi dëmtime të rënda dhe u transportua me urgjencë në Spitalin Rajonal të Fierit, ku iu nënshtrua një ndërhyrjeje kirurgjikale.

Pavarësisht përpjekjeve të stafit mjekësor për t’i shpëtuar jetën, e mitura nuk ka mundur t’u mbijetojë plagëve të marra dhe ka ndërruar jetë mëngjesin e kësaj të enjteje në ambientet e spitalit.

Ngjarja ka shkaktuar dhimbje dhe trishtim te familjarët dhe komuniteti i qytetit të Fierit, ndërsa autoritetet vijojnë hetimet për zbardhjen e plotë të rrethanave të aksidentit.