Egnatia ka shkruar një tjetër faqe të rëndësishme për futbollin shqiptar, duke siguruar kualifikimin në raundin e dytë kualifikues të UEFA Champions League pas një fitoreje spektakolare 6-1 ndaj kampionëve të Moldavisë, Petrocub.

Pas barazimit 1-1 në ndeshjen e parë, skuadra rrogozhinase dhuroi një paraqitje fantastike në “Arena Egnatia”, duke dominuar sfidën që nga minutat e para. Bitri zhbllokoi rezultatin që në minutën e dytë, ndërsa Albanese dhe një autogol i Platica çuan ekipin shqiptar në pushim me avantazhin 3-0.

Në pjesën e dytë, Egnatia vazhdoi presionin dhe gjeti golin e katërt me Yago në minutën e 58-të. Edhe pse Petrocub shënoi një gol ngushëllues, kampionët e Shqipërisë reaguan menjëherë me Bakayokon dhe Grudën, duke vulosur triumfin e thellë 6-1.

Me këtë rezultat, Egnatia siguron një kualifikim historik dhe vazhdon ëndrrën europiane. Në raundin e dytë kualifikues të Champions League, kampionët shqiptarë do të përballen me skuadrën sllovene NK Celje, me synimin për të vijuar rrugëtimin drejt fazave më të avancuara të kompeticionit.