Kryeministri në detyrë Albin Kurti kërkoi avancimin e procesit të integrimit evropian të Kosovës gjatë një takimi me ambasadorin jo-rezident të Irlandës, Ragnar Almqvist.

Kryeministri në detyrë i Kosovës, Albin Kurti, ka pritur në takim ambasadorin jo-rezident të Irlandës për Kosovën, Ragnar Almqvist, dy javë pasi Irlanda mori Presidencën e Këshillit të Bashkimit Evropian.

Gjatë takimit, Kurti e cilësoi Irlandën një partner të rëndësishëm dhe mik të Kosovës, duke vlerësuar mbështetjen e vazhdueshme të Dublinit në kuadër të misioneve ndërkombëtare, përfshirë KFOR-in dhe EULEX-in.

Në fokus të bisedimeve ishte procesi i integrimit evropian të Kosovës. Kurti theksoi se vendi ka shënuar progres në reformat demokratike dhe ekonomike, duke kërkuar që ky përparim të reflektohet përmes dhënies së statusit të vendit kandidat dhe hapjes së negociatave për anëtarësim në Bashkimin Evropian.

Sipas tij, Kosova është ndër demokracitë më të konsoliduara në rajon, me zhvillim ekonomik të qëndrueshëm dhe një orientim të qartë drejt politikave të jashtme dhe të sigurisë së Bashkimit Evropian.

Kurti nënvizoi gjithashtu se mbështetja e lartë e qytetarëve për integrimin evropian, si dhe përafrimi i vazhdueshëm me politikat e BE-së, përbëjnë argumente të forta për avancimin e procesit të anëtarësimit të Kosovës në Union.

Takimi zhvillohet në një periudhë kur Irlanda mban Presidencën e Këshillit të Bashkimit Evropian, ndërsa autoritetet kosovare vijojnë përpjekjet diplomatike për të siguruar mbështetje në rrugën drejt integrimit evropian.