Ish-deputeti demokrat akuzon drejtimin e Partisë Demokratike se gara për postet drejtuese ishte formale dhe kishte si synim largimin e Luçiano Boçit nga posti i nënkryetarit.

Ish-deputeti i Partisë Demokratike, Muslim Murrizi, ka reaguar pas zgjedhjeve për postet drejtuese në PD, ku Flamur Noka u rikonfirmua në detyrën e Sekretarit të Përgjithshëm.

Përmes një postimi në rrjetet sociale, Murrizi ngriti akuza për mënyrën e zhvillimit të procesit zgjedhor brenda partisë, duke pretenduar se kandidatët rivalë në disa raste ishin formalë dhe se rezultati ishte i paracaktuar.

Sipas tij, e vetmja garë reale ishte ajo mes Luçiano Boçit dhe Belind Këlliçit për një nga postet e nënkryetarit të Partisë Demokratike.

“E vetmja garë dje, por edhe ajo e qëllimshme për të hequr si nënkryetar Luçiano Boçin, ishte ajo midis Luçiano Boçit dhe Belind Këlliçit”, shkroi Murrizi.

Ai pretendoi se pas largimit të Boçit nga drejtimi i partisë, struktura e Rithemelimit ka ndryshuar ndjeshëm, duke shtuar se në drejtimin e PD-së janë rikthyer figura që më herët kishin mbështetur ish-kryetarin Lulzim Basha.

Në reagimin e tij, Murrizi e cilësoi procesin si një "ripërtypje" dhe jo si një "ripërtëritje" të Partisë Demokratike, duke vënë në pikëpyetje përfaqësimin e figurave që, sipas tij, kanë marrë mbështetje më të madhe nga anëtarësia dhe elektorati.

Ai kritikoi gjithashtu përbërjen e ekipit të ri drejtues, duke argumentuar se në të janë përfshirë figura me pak kontribut politik dhe mbështetje elektorale.

Deklaratat e Murrizit vijnë në një moment kur Partia Demokratike po riorganizon strukturat e saj drejtuese, pas procesit të zgjedhjeve të brendshme dhe në prag të përgatitjeve për aksionin e ri politik.