Drejtësia italiane ka dhënë vendime ndaj zyrtarëve të akuzuar për tragjedinë e vitit 2018, ku humbën jetën 43 persona pas shembjes së urës së autostradës në Gjenovë.

Ish-drejtuesi i operatorit të autostradave në Itali, Giovanni Castellucci, është dënuar me 12 vite burg për shembjen e urës Morandi në Gjenovë, një nga tragjeditë më të rënda infrastrukturore në vend.

Shembja ndodhi në gusht të vitit 2018, kur një pjesë e urës së autostradës u rrëzua gjatë një stuhie të fortë shiu, duke shkaktuar vdekjen e 43 personave. Automjete dhe kamionë ranë nga lartësia, duke shkaktuar një bilanc tragjik në një prej akseve më të rëndësishme të qytetit.

Prokuroria kishte kërkuar një dënim më të lartë për Castelluccin, i cili në atë kohë drejtonte kompaninë “Autostrade per l’Italia”. Ai ishte një nga 57 të pandehurit në procesin gjyqësor të zhvilluar në Gjenovë.

Një tjetër ish-zyrtar i lartë i kompanisë, Michele Donferri Mitelli, është dënuar me 11 vite burg.

Castellucci, i cili aktualisht po vuan edhe një dënim prej gjashtë vitesh burg për një tjetër aksident rrugor të vitit 2013, u përball me akuzat për përgjegjësi lidhur me mungesën e mirëmbajtjes dhe kontrolleve të nevojshme mbi strukturën e urës.

Vendimi i gjykatës është mirëpritur nga familjarët e viktimave. Emmanuel Diaz, vëllai i një prej personave që humbën jetën në tragjedi, deklaroi se ishte i kënaqur me vendimin.

Edhe Egle Possetti, e cila humbi motrën dhe familjarë të tjerë në shembjen e urës, e cilësoi dënimin prej 12 vitesh për Castelluccin si një vendim të pranueshëm.

Procesi gjyqësor për tragjedinë e urës Morandi konsiderohet një nga çështjet më të rëndësishme të drejtësisë italiane në lidhje me përgjegjësinë e menaxhimit të infrastrukturës publike.