Me 78 vota pro, deputetët miratuan shtyrjen e afatit të punimeve të Komisionit të Posaçëm Parlamentar për Realizimin e Reformës Zgjedhore.

Kuvendi ka vendosur zgjatjen e mandatit të Komisionit të Posaçëm Parlamentar për Realizimin e Reformës Zgjedhore deri më 30 nëntor 2026.

Vendimi u mor pas mbledhjes së Konferencës së Kryetarëve, të drejtuar nga Kryetari i Kuvendit, Niko Peleshi, ku u shqyrtua kërkesa për shtyrjen e afatit të veprimtarisë së këtij komisioni.

Pas diskutimeve, çështja iu kalua për votim seancës plenare, ku u miratua me 78 vota pro zgjatja e mandatit të komisionit.

Komisioni i Posaçëm Parlamentar ka në fokus përgatitjen e ndryshimeve dhe propozimeve që lidhen me reformimin e kuadrit zgjedhor, në funksion të përmirësimit të proceseve elektorale.

Gjatë mbledhjes së Konferencës së Kryetarëve u vendos gjithashtu që më 20 korrik 2026 të zhvillohet një seancë plenare e dedikuar për raportimin e institucioneve kushtetuese.

Po ashtu, në një nga seancat e mbetura të këtij sesioni parlamentar do të përfshihet edhe raportimi mbi veprimtarinë e Komisionit të Posaçëm Parlamentar për Reformën Administrativo-Territoriale.