Një ngjarje tragjike është regjistruar në Algjeri, ku një zjarr i fuqishëm përfshiu një jetimore në lindje të kryeqytetit Algjer, duke shkaktuar vdekjen e të paktën 11 personave dhe plagosjen e 20 të tjerëve.

Sipas autoriteteve të Shërbimit të Mbrojtjes Civile, zjarri shpërtheu në orët e para të mëngjesit në një institucion për fëmijë në zonën Mohammadia të Algjerit.

Zëdhënësi i Shërbimit Algjerian të Mbrojtjes Civile, Karim Ben Fahsi, deklaroi se ekipet e zjarrfikësve vijuan përpjekjet për shuarjen e flakëve dhe për menaxhimin e situatës në vendngjarje.

Shkaku i zjarrit ende nuk është përcaktuar, ndërsa autoritetet kanë nisur hetimet për të zbardhur rrethanat e plota të tragjedisë.

Më herët, Shërbimi i Mbrojtjes Civile bëri të ditur se ekipet e shpëtimit kishin evakuuar pesë persona me nevoja të veçanta nga godina dhe i kishin dërguar në një zonë të sigurt.

Operacionet e kërkim-shpëtimit vijojnë ende, ndërsa autoritetet paralajmërojnë se bilanci i viktimave mund të ndryshojë.