Deputeti i Partisë Socialiste, Erion Braçe, ka ngritur shqetësimin për situatën me të cilën, sipas tij, po përballen fermerët shqiptarë, duke kërkuar ndërhyrje ligjore për të frenuar abuzimet në tregun e produkteve bujqësore.

Gjatë fjalës së tij në Kuvend, Braçe solli si shembull tregtimin e shalqirit në Divjakë, ku, sipas tij, persona që ushtrojnë aktivitet pa licencë dhe pa qenë të regjistruar në organet tatimore u diktojnë fermerëve çmime shumë të ulëta për prodhimin.

Deputeti theksoi se, ndërsa konsumatorët e blejnë shalqirin në treg me rreth 30 lekë për kilogram, fermerët detyrohen ta shesin me vetëm 6 deri në 7 lekë për kilogram.

Sipas Braçes, kjo situatë kërkon rregullim të menjëhershëm të tregut, duke ndarë qartë rolin e furnizuesve të inputeve bujqësore nga ai i grumbulluesve, eksportuesve dhe financuesve.

“Kur i njëjti subjekt kontrollon furnizimin me inpute, grumbullimin, eksportin dhe financimin, ai fiton një pozitë dominuese në treg dhe është në gjendje t’u diktojë fermerëve çmime gjithnjë e më të ulëta”, u shpreh deputeti.

Braçe tha se shumë fermerë përballen me presion për të pranuar çmimin që u ofrohet, pasi në të kundërt rrezikojnë të mos arrijnë ta shesin prodhimin.

Duke përshkruar situatën në terren, ai citoi mënyrën se si, sipas tij, zhvillohen negociatat mes grumbulluesve dhe fermerëve.

“Pyetja që u bëhet është: ‘Do ta shesësh me këtë çmim?’ Nëse përgjigjja është ‘Jo’, përgjigjja që marrin është: ‘Atëherë nuk ta blejmë.’ Kjo është marrëdhënia tregtare që po ekziston sot në shumë zona bujqësore”, deklaroi Braçe, duke kërkuar ndjesë për gjuhën e përdorur në citim.

Deputeti socialist theksoi se miratimi i një ligji nuk do të japë rezultat nëse nuk shoqërohet me reforma në sistemin fiskal dhe me mekanizma që garantojnë mbrojtjen e fermerëve nga praktikat abuzive.

Ai pranoi se në sektor ka edhe modele pozitive funksionimi, por nënvizoi se rastet e abuzimit ndaj prodhuesve duhet të identifikohen dhe të marrin fund, në mënyrë që fermerët të përfitojnë një shpërblim të drejtë për punën dhe prodhimin e tyre.