Fundi i gjysmëfinales së Botërorit mes Anglisë dhe Argjentinës është shoqëruar me tensione në fushë, pas fitores 2-1 të argjentinasve dhe kualifikimit të tyre në finale.

Sipas pamjeve të publikuara në rrjetet sociale, lojtari rezervë i Argjentinës, Valentín Barco, u fut në fushë për të festuar së bashku me shokët e skuadrës. Në video, ai shihet duke iu afruar mesfushorit anglez Jude Bellingham dhe duke i thënë diçka.

Menjëherë pas këtij momenti, Bellingham reagoi duke e goditur me shuplakë Barcon, çka solli një përplasje të shkurtër mes lojtarëve.

Situata u qetësua brenda pak çastesh falë ndërhyrjes së futbollistëve të Argjentinës, të cilët shmangën përshkallëzimin e incidentit. Deri më tani nuk ka një reagim zyrtar nga ekipet apo organizatorët lidhur me ngjarjen, ndërsa mbetet për t’u parë nëse incidenti do të shqyrtohet nga organet disiplinore të FIFA-s.