Gazetari Lavdërim Lita ka deklaruar se, sipas informacioneve të tij, Flamur Noka ka ofruar disa herë dorëheqjen nga posti i Sekretarit të Përgjithshëm të Partisë Demokratike, por ajo nuk është pranuar nga kryetari i PD-së, Sali Berisha.

Në një intervistë për A2, Lita tha se Berisha ka këmbëngulur që Noka të vijojë të mbajë këtë funksion, duke argumentuar se ai e konsideron të rëndësishëm rolin e tij në strukturat drejtuese të partisë.

“Do t’ua them si lajm, që unë e di para shumë kohësh, z. Noka ka ofruar disa herë dorëheqjen te z. Berisha, por është z. Berisha që këmbëngul që z. Noka të qëndrojë aty”, u shpreh Lita.

Sipas gazetarit, në rast të një largimi të Nokës, përgjegjësitë për drejtimin e partisë do të kalonin te persona të tjerë. Ai gjithashtu shprehu mendimin e tij mbi mënyrën e funksionimit të marrëdhënieve drejtuese brenda PD-së.

“Në PD është z. Berisha që vendos dhe z. Noka që zbaton urdhrat e z. Berisha”, deklaroi Lita.

Deklaratat e gazetarit vijnë në një kohë kur Partia Demokratike po zhvillon procesin për zgjedhjen e strukturave të reja drejtuese, ku Flamur Noka është sërish kandidat për postin e Sekretarit të Përgjithshëm, përballë deputetit Saimir Korreshi.