Mbledhja e Këshillit Kombëtar të Partisë Demokratike është shoqëruar me debate në pjesën përmbyllëse, ku pati një përplasje verbale mes kryetarit të PD-së, Sali Berisha, dhe ish-kandidates për deputete, Ilirjana Kuçana.

Sipas diskutimit të zhvilluar në mbledhje, Kuçana kërkoi të merrte fjalën për të paraqitur një kërkesë, duke deklaruar se e kishte depozituar atë 24 orë më parë dhe duke i bërë thirrje drejtuesve të zbatonin statutin e partisë.

“Të lutem, kam një kërkesë që e kam depozituar 24 orë më parë. Ne jemi anëtarë të Këshillit Kombëtar. Të lutem, zbatoje statutin”, u shpreh ajo.

Berisha iu përgjigj se procedurat për paraqitjen e rezolutave janë të përcaktuara në statut dhe se ato duhet të respektohen.

“Një minutë, më lër të flas. Paraqitja e rezolutave ka rregullat e veta. Do të kesh të drejtë të paraqitesh sa herë të duash, por vetëm sipas rregullit. Lexoje statutin”, deklaroi kreu i PD-së.

Në vijim të debatit, Kuçana akuzoi drejtimin e partisë për shkelje të statutit, duke iu referuar përjashtimit të 34 anëtarëve.

“Statutin e keni shkelur që në momentin kur keni përjashtuar 34 veta”, tha ajo.

Berisha u përgjigj se kishte komunikuar me Kuçanën më herët gjatë ditës dhe se i kishte kërkuar të ndiqte procedurat statutore.

“Ilirjana, ke komunikuar me mua sot, të kam kthyer përgjigje dhe të kam thënë: ndiqe statutin”, u shpreh Berisha.

Debati u zhvillua në përfundim të mbledhjes së Këshillit Kombëtar, ku po zhvillohej procesi për zgjedhjen e strukturave drejtuese të Partisë Demokratike.