Deputeti i Partisë Demokratike, Saimir Korreshi, ka konfirmuar kandidaturën e tij për postin e Sekretarit të Përgjithshëm të PD-së, duke hyrë në garë përballë Flamur Nokës.

Kandidatura e Korreshit u bë publike pak para nisjes së mbledhjes së Këshillit Kombëtar të Partisë Demokratike, ku pritet të zhvillohet votimi për zgjedhjen e drejtuesve të rinj të strukturave të partisë.

I pyetur nga gazetarët nëse kishte zhvilluar fushatë për të siguruar mbështetjen e anëtarëve të Këshillit Kombëtar, Korreshi u shpreh se nuk e konsideron të nevojshëm një proces të tillë, pasi të dy kandidatët janë figura të njohura brenda Partisë Demokratike.

“Është vendim i ditës së sotme”, deklaroi ai.

Në pyetjen nëse kandidimi ishte një vendim personal, Korreshi u përgjigj: “Nuk më detyron njeri. Na njohin. Lobimi është ajo çka ne përfaqësojmë me njëri-tjetrin. Të gjithë e dinë. Nëse ka ardhur koha që do ndryshojë, do ndryshojë.”

Deputeti demokrat nuk preferoi të komentojë prioritetet e tij në rast se zgjidhet në postin e Sekretarit të Përgjithshëm, duke theksuar se fillimisht duhet të përfundojë procesi i votimit.

Votimi në Këshillin Kombëtar do të përcaktojë nëse Flamur Noka do të vijojë të mbajë detyrën e Sekretarit të Përgjithshëm të Partisë Demokratike, apo nëse këtë funksion do ta marrë Saimir Korreshi.