Ish-kryeministri i Kosovës dhe deputeti i zgjedhur i LDK-së, Avdullah Hoti, ka reaguar pas dorëzimit të firmave që kërkojnë shkarkimin e kryetarit të partisë, Lumir Abdixhiku.

Përmes një reagimi në rrjetet sociale, Hoti u shpreh se forca e Lidhjes Demokratike të Kosovës buron nga vullneti i anëtarësisë dhe jo nga ambiciet individuale.

“Forca e LDK-së është vullneti i anëtarësisë, jo ambicia e individëve. Askush nuk është mbi LDK-në dhe anëtarësinë e saj”, shkroi Hoti.

Ai më herët kishte kërkuar përgjegjësi nga drejtuesit e partisë për rezultatet e dobëta në zgjedhje.

Gjatë ditës, deputetët Armend Zemaj dhe Florian Dushi, përfaqësues të degëve të LDK-së në Deçan dhe Prishtinë, dorëzuan 150 firma që kërkojnë mbajtjen e Kuvendit të Jashtëzakonshëm për shkarkimin e Lumir Abdixhikut nga drejtimi i partisë.