Një familje në Shtetet e Bashkuara të Amerikës ka humbur pothuajse gjithçka pasi një qen shkaktoi pa dashje një zjarr masiv që përfshiu të gjithë banesën.

Ngjarja ndodhi në Maryland, ku ekipet e emergjencës mbërritën në një shtëpi në Foxglove Court rreth orës 17:30 të së premtes, pas njoftimit për një zjarr të përmasave të mëdha.

Dy qentë e familjes, Bo dhe Addie, u shpëtuan nga fqinjët, të cilët hynë në banesën e përfshirë nga flakët për t’i nxjerrë jashtë përpara mbërritjes së zjarrfikësve. Ndërhyrja e ekipeve të emergjencës bëri të mundur vënien nën kontroll të zjarrit brenda rreth 20 minutash, por dëmet në banesë ishin të konsiderueshme.

Nga zjarri humbën jetën një tjetër qen i familjes, Dakota, si dhe dy mace. Në momentin e ngjarjes nuk kishte persona brenda shtëpisë dhe nuk pati të lënduar.

Pas hetimeve në vendngjarje, zjarrfikësit zbuluan shkakun e pazakontë të incidentit. Njëri prej qenve ishte ngjitur mbi banakun e kuzhinës dhe kishte aktivizuar aksidentalisht tostierën, e cila ndodhej pranë materialeve që merrnin flakë lehtësisht. Zjarri më pas ishte përhapur me shpejtësi në të gjithë banesën.

Sipas autoriteteve, momenti dyshohet se është regjistruar nga kamera e sigurisë së shtëpisë. Pamjet tregojnë qenin duke lëvizur mbi banak dhe duke prekur sende me putrat e tij, pak para nisjes së zjarrit.

Zyrtarët e zjarrfikësve e kanë cilësuar ngjarjen si një aksident tragjik. Në një zhvillim të pazakontë, qeni që shkaktoi zjarrin ishte një prej kafshëve të shpëtuara dhe nuk pësoi dëmtime.

Edhe një tjetër kafshë shtëpiake, një hardhucë e llojit “dragon me mjekër”, u gjet gjallë mes rrënojave dhe u dërgua për trajtim intensiv, duke arritur të mbijetojë.

Dëmet në banesë nga zjarri, tymi, bloza dhe uji i përdorur gjatë ndërhyrjes vlerësohen rreth 200 mijë dollarë, ku rreth 150 mijë dollarë janë dëme strukturore dhe rreth 50 mijë dollarë humbje të sendeve brenda shtëpisë.

Sipas të dhënave të organizatave të sigurisë në SHBA, kafshët shtëpiake shkaktojnë çdo vit rreth 1000 zjarre në banesa, kryesisht duke aktivizuar aksidentalisht pajisje kuzhine ose duke rrëzuar pajisje ngrohëse.