Ish-ministri gjerman për Evropën, Michael Roth, ka reaguar ashpër ndaj deklaratës së ministres serbe Snezhana Paunoviç, e cila tha se, nëse do të ishte në vend të Sllobodan Millosheviçit në vitin 1998, do ta kishte “spastruar etnikisht Kosovën”.

Përmes një reagimi publik, Roth e cilësoi deklaratën si të papranueshme dhe shprehu shqetësimin për mungesën e reagimit nga politika dhe shoqëria serbe.

“Një ministër serb fantazon hapur për ‘spastrimin etnik’ të Kosovës. Dhe pothuajse nuk ka asnjë kundërshtim në politikë apo në shoqëri. Si është e mundur që një vend të anëtarësohet në Bashkimin Evropian në këtë mënyrë? Urrejtja dhe nacionalizmi nuk ndërtojnë partneritet. Kjo është thjesht e trishtueshme dhe frustruese”, shkroi Roth.

Deklarata e ministres serbe ka shkaktuar reagime të forta në Shqipëri dhe Kosovë. Politikanë shqiptarë kanë kërkuar shpalljen e saj “non grata”, ndërsa u kanë dërguar letra informuese përfaqësive diplomatike dhe institucioneve ndërkombëtare lidhur me deklaratat e saj.