Policia e Lezhës ka zbuluar një ambient të përshtatur për kultivimin e bimëve narkotike në fshatin Velë, ku janë arrestuar dy persona dhe janë proceduar penalisht katër punonjës të OSHEE-së.

Operacioni i koduar “Lightning” çoi në zbulimin e pesë ambienteve të mbyllura dhe të hapura, të përdorura për kultivimin e kanabisit. Në total u asgjësuan 174 bimë të dyshuara narkotike Cannabis Sativa.

Në pranga ranë M. F., 39 vjeç, pronar i banesës, dhe A. M., 27 vjeç, banues në Ishull Shëngjin. Gjatë kontrollit në banesë u gjetën 119 bimë narkotike të kultivuara me llamba dhe pajisje të tjera që furnizoheshin përmes lidhjeve të paligjshme të energjisë elektrike.

Kontrollet vijuan në afërsi të banesës, ku u zbuluan edhe dy parcela me 55 bimë narkotike, ndërsa në banesën e 27-vjeçarit u sekuestruan 16 telefona celularë.

Policia sekuestroi gjithashtu dy armë gjahu, pajisje të përdorura për kultivimin e bimëve narkotike në ambiente të mbyllura, një sasi lënde të dyshuar narkotike Cannabis Sativa, një automjet dhe 18 telefona celularë.

Katër punonjës të OSHEE-së janë proceduar penalisht për veprat “Shpërdorimi i detyrës” dhe “Korrupsioni pasiv”, ndërsa hetimet vijojnë për identifikimin e personave të tjerë të përfshirë në veprimtarinë kriminale.