Shqipëria po përballet me një plakje të vazhdueshme të popullsisë, ndërsa të dhënat tregojnë se gratë po arrijnë moshat më të larta mesatare më shpejt se burrat.

Sipas INSTAT, mosha mediane e grave në vitin 2024 ka arritur në 45,4 vjeç, ndërsa ajo e burrave është 43,1 vjeç. Diferenca mes dy gjinive është 2,3 vite, duke treguar një strukturë demografike ku gratë përfaqësojnë një pjesë më të madhe të grupmoshave të avancuara.

Raporti “Gratë dhe Burrat 2025” evidenton se gjysma e grave në Shqipëri janë mbi moshën 45 vjeç, ndërsa brenda një viti mosha mediane e tyre është rritur me 0,7 vite.

Plakja e popullsisë lidhet me disa faktorë kryesorë, mes të cilëve rënia e lindjeve dhe emigracioni i vazhdueshëm i të rinjve. Largimet nga vendi kanë prekur veçanërisht grupmoshat në moshë pune, duke ulur peshën e brezave të rinj dhe duke rritur përqindjen e të moshuarve.

Në fund të vitit 2024, Shqipëria kishte 2,36 milionë banorë, me një rënie prej 1,2% krahasuar me një vit më parë. Numri i grave u ul me 1%, ndërsa ai i burrave me 1,3%.

Jetëgjatësia më e lartë e grave është një nga arsyet kryesore që ato dominojnë grupmoshat më të mëdha. Kjo sjell gjithashtu sfida më të mëdha sociale dhe ekonomike, pasi rritet nevoja për shërbime shëndetësore, kujdes afatgjatë dhe mbështetje sociale.

Një popullsi më e moshuar pritet të ushtrojë presion mbi tregun e punës dhe skemën e pensioneve, ndërsa tkurrja e brezave të rinj mund të ndikojë në zhvillimin ekonomik të vendit në vitet e ardhshme.