Kapiteni i Francës, Kylian Mbappé, analizoi me tone të sinqerta humbjen 2-0 ndaj Spanjës në gjysmëfinalen e Kupës së Botës 2026, duke pranuar se "Les Bleus" dështuan si taktikisht ashtu edhe teknikisht përballë një kundërshtari që kontrolloi ndeshjen nga fillimi në fund.

Pas eliminimit në Dallas, sulmuesi francez tha se skuadra e Didier Deschamps nuk arriti të zbatonte planin e lojës të përgatitur për sfidën, ndërsa Spanja imponoi ritmin e saj përmes kontrollit të topit.

"Nuk luajtëm ndeshjen që donim të luanim. Taktikisht, teknikisht dhe në përgjithësi nuk ishim në nivelin që kërkonte një gjysmëfinale e Kupës së Botës. Kur nuk bën atë që ke përgatitur, nuk mund të fitosh. Spanja iu përmbajt planit të saj të lojës dhe e kontrolloi ritmin e ndeshjes. Ne donim t’ua prishnim atë ritëm, por nuk ia dolëm," u shpreh Mbappé.

Kapiteni francez theksoi se skuadra bëri shumë gabime teknike dhe nuk arriti të shfrytëzonte momentet kur kishte topin në zotërim.

"Kishte shumë gabime teknike. Nuk dinim si t’i dëmtonim kur ishte momenti. Nuk luajtëm ndeshjen për të cilën ishim përgatitur. Kur Spanja kontrollon topin dhe dikton ritmin, gjithçka bëhet më e vështirë. Na takonte ne ta ndryshonim atë ekuilibër, por dështuam," deklaroi ai.

Mbappé evidentoi edhe problemet në organizimin taktik të Francës, duke pranuar se presioni ndaj mesfushës spanjolle nuk funksionoi.

"Ishim nën presion dhe nuk e menaxhuam mirë mënyrën si duhej të ushtronim presingun. Në mesfushë ishim në inferioritet dhe Fabian Ruiz me Rodrin kishin shumë kohë për të ndërtuar lojën. Kishte mungesë komunikimi në momentet e presionit. Kur fitonim topin, pasimet dhe prekjet e para nuk ishin në nivelin e një gjysmëfinaleje të Kupës së Botës. Kur i bashkon të gjitha këto, rezultati është një humbje," shtoi sulmuesi.

Në fund, Mbappé nuk e fshehu zhgënjimin për eliminimin, por u shpreh se skuadra duhet ta pranojë humbjen dhe të shohë përpara.

"Është një zhgënjim i madh. Ëndërronim të shkonim në finale dhe t’i jepnim Francës mundësinë të vazhdonte të ëndërronte. Kur fitojmë, fitojmë me kokën lart dhe kur humbasim duhet ta mbajmë po ashtu kokën lart. Tani duhet të pushojmë, të mësojmë nga ky dështim dhe të ecim përpara, sepse futbolli nuk pret askënd," përfundoi kapiteni i Francës.